'കുബേര' എന്ന ചിത്രത്തിന് ശേഷം ധനുഷ് സ്വയം സംവിധാനം ചെയ്തു നായകനായി അഭിനയിക്കുന്ന 'ഇഡ്ലി കടൈ' എന്ന തമിഴ് ചിത്രമാണ് റിലീസാകാനിരിക്കുന്നത്. അതേ സമയം 'തേരെ ഇസ്ക് മേൻ' എന്ന ഹിന്ദി ചിത്രത്തിലും ധനുഷ് അഭിനയിച്ച് കൊണ്ടിരിക്കുകയാണ്.
ഈ ചിത്രങ്ങൾക്കൊപ്പം തമിഴിൽ റിലീസായി സൂപ്പർഹിറ്റായ 'പോർ തൊഴിൽ' എന്ന ചിത്രം സംവിധാനം ചെയ്ത വിഘ്നേഷ് രാജയുടെ സംവിധാനത്തിലും ധനുഷ് അഭിനയിക്കാനിരിക്കുകയാണ്. ഈ ചിത്രത്തിന് 'അറുവടൈ' എന്ന് പേരിട്ടിരിക്കുന്നതായി ഒരു റിപ്പോർട്ടുണ്ട്.
ഐശ്വരി ഗണേഷിന്റെ 'വേൽസ് ഫിലിംസ് ഇന്റർനാഷണ'ലാണ് ഈ ചിത്രം നിർമ്മിക്കുന്നത്. ഈ ചിത്രത്തിന്റെ ഷൂട്ടിങ്ങ് ജൂലൈ 15-ന് ആരംഭിക്കുമെന്നാണ് പറയപ്പെടുന്നത്. ഈ സാഹചര്യത്തിലാണ് ഈ ചിത്രത്തിൽ നായികയായി അഭിനയിക്കാൻ പ്രശസ്ത തെന്നിന്ത്യൻ താരമായ പൂജ ഹെഗ്ഡെയെ തിരഞ്ഞെടുത്തതായുള്ള വാർത്ത പുറത്തുവന്നിരിക്കുന്നത്. ജീവയ്ക്കൊപ്പം 'മുഖമൂടി', വിജയ്ക്കൊപ്പം 'ബീസ്റ്റ്', സൂര്യയ്ക്കൊപ്പം 'റെട്രോ' എന്നീ തമിഴ് ചിത്രങ്ങളിൽ അഭിനയിച്ചിട്ടുള്ള പൂജ ഹെഗ്ഡെ ഈ ചിത്രം സംബന്ധമായുള്ള കരാറിൽ ഒപ്പുവച്ചു എന്നും, ഇതിന്റെ ഔദ്യോഗിക പ്രഖ്യാപനം ഉടൻ ഉണ്ടാകുമെന്നുമാണ് പറയപ്പെടുന്നത്.
