ഹൈദരാബാദ്: തെലുങ്ക് ഫോക്ക് ഗാനരംഗത്തെ താരങ്ങളായ ഈശ്വർ സായിയും നടി മധുരി റാത്തോഡും ഉൾപ്പെട്ട വിവാദം സമൂഹമാധ്യമങ്ങളിൽ ചർച്ചയാകുന്നു. ഇരുവരും ഒരേ ഹോട്ടൽ മുറിയിൽ കഴിയുന്നതായി കണ്ടെത്തിയതിനെ തുടർന്ന് ഈശ്വർ സായിയുടെ ഭാര്യ ശരണ്യ ഹോട്ടലിലെത്തി മധുരിയെ മർദിച്ചെന്നാണ് റിപ്പോർട്ടുകൾ.

തെലങ്കാനയിൽ നിരവധി ജനപ്രിയ നാടോടിഗാനങ്ങളിലൂടെ ശ്രദ്ധ നേടിയവരാണ് ഈശ്വർ സായിയും മധുരി റാത്തോഡും. വെമുലവാഡയിലെ റെഡ്ഡി ഭവനിലെ ഹോട്ടലിൽ അർധരാത്രിയോടെ ഇരുവരെയും ഒരേ മുറിയിൽ കണ്ടെത്തിയതാണ് ശരണ്യയെ പ്രകോപിപ്പിച്ചതെന്നാണ് തെലുങ്ക് മാധ്യമങ്ങൾ റിപ്പോർട്ട് ചെയ്യുന്നത്.

മകനെയും കൂട്ടിയെത്തിയ ശരണ്യ മുറിയിലേക്ക് അതിക്രമിച്ച് കയറി മധുരിയെ മർദിക്കുകയായിരുന്നു എന്നാണ് ആരോപണം. തുടർന്ന് കുളിമുറിയിലായിരുന്ന ഈശ്വർ സായിയെ പുറത്തേക്ക് വലിച്ചിഴച്ച് എല്ലാവരുടെയും മുന്നിൽ നിർത്തിയെന്നും റിപ്പോർട്ടുകളുണ്ട്. സംഭവത്തിന്റെ ദൃശ്യങ്ങൾ ഇതിനോടകം സമൂഹമാധ്യമങ്ങളിൽ പ്രചരിക്കുന്നുണ്ട്.

‘കുടുംബജീവിതം തകർത്തു’

ഈശ്വർ സായിയും മധുരി റാത്തോഡും തമ്മിൽ വിവാഹേതര ബന്ധമുണ്ടെന്നാണ് ശരണ്യയുടെ ആരോപണം. മധുരി മനഃപൂർവം തന്റെ ഭർത്താവിനെ വശീകരിച്ച് കുടുംബജീവിതത്തിൽ ഇടപെട്ടെന്നും ഇതോടെ കുടുംബം തകർന്നെന്നും ശരണ്യ ആരോപിച്ചതായാണ് റിപ്പോർട്ടുകൾ.

മധുരി വ്യക്തിജീവിതത്തിൽ പ്രതിസന്ധി നേരിട്ടിരുന്ന സമയത്ത് താൻ അവരെ ആശ്വസിപ്പിക്കുകയും പിന്തുണയ്ക്കുകയും ചെയ്തിരുന്നുവെന്നും ശരണ്യ പറഞ്ഞു. എന്നാൽ, പിന്നീട് അവർ തന്നെ പിന്നിൽനിന്ന് വഞ്ചിക്കുമെന്ന് കരുതിയിരുന്നില്ലെന്നും ശരണ്യ വികാരാധീനയായി പ്രതികരിച്ചതായി തെലുങ്ക് മാധ്യമങ്ങൾ റിപ്പോർട്ട് ചെയ്യുന്നു.

സംഭവത്തെ തുടർന്ന് തെലുങ്ക് ഫോക്ക് മ്യൂസിക് രംഗത്തും വിവാദം ശക്തമായിട്ടുണ്ട്. അതേസമയം, സംഭവവുമായി ബന്ധപ്പെട്ട് ഈശ്വർ സായിയുടെയോ മധുരി റാത്തോഡിന്റെയോ വിശദമായ പ്രതികരണം പുറത്തുവന്നിട്ടുണ്ടോയെന്നത് വ്യക്തമല്ല.