'വീര ധീര സൂരൻ' എന്ന ചിത്രത്തിന് ശേഷം 'ചിയാൻ' വിക്രം നായകനായി  അഭിനയിക്കുന്ന പേരിടാത്ത തമിഴ് സിനിമയുടെ ചിത്രീകരണം നടന്നു വരികയാണ്. വിക്രമിനെ നായകനാക്കി 'ഇരുമുഖൻ' എന്ന സിനിമ സംവിധാനം ചെയ്ത ആനന്ദ് ശങ്കർ സംവിധാനം ചെയ്യുന്ന ഈ സിനിമ വിക്രമിന്റെ  63-ാമത്തെ ചിത്രമാണ്. തമിഴിലെ വമ്പൻ ബാനറുകളിലൊന്നായ  'സത്യജോതി ഫിലിംസ്' നിർമ്മിക്കുന്ന ഈ ചിത്രം ഒരു ആക്ഷൻ  ത്രില്ലറായിട്ടാണ് ഒരുങ്ങുന്നത്. 

ഈ സാഹചര്യത്തിലാണ് ഈ ചിത്രത്തിൽ വിക്രമിനൊപ്പം ഒരു പ്രധാന വില്ലൻ കഥാപാത്രം അവതരിപ്പിക്കുന്നത് ഷമ്മി തിലകനാണെന്നുള്ള വാർത്ത പുറത്തുവന്നിരിക്കുന്നത്. നേരത്തെ വിജയ്-യും മോഹൻലാലും ഒന്നിച്ചഭിനയിച്ച 'ജില്ലാ' എന്ന  തമിഴ് ചിത്രത്തിൽ ഷമ്മി തിലകൻ വില്ലനായി അഭിനയിച്ചിരുന്നു. അതിന് ശേഷം ഷമ്മി തിലകൻ തമിഴിൽ  വില്ലനായി അഭിനയിക്കുന്ന ചിത്രമാണ് ഇത്. അതുപോലെ 90-കളിൽ 'ചിയാൻ' വിക്രം ചില മലയാള സിനിമകളിൽ അഭിനയിച്ചിരുന്നു.

അതിൽ ഒന്നാണ് മമ്മുട്ടി നായകനായ 'ധ്രുവം' എന്ന ചിത്രം.  ഇതിൽ വിക്രമിനൊപ്പം ഷമ്മി തിലകനും അഭിനയിച്ചിരുന്നു. മറ്റൊരു സിനിമ ബാബു ആന്റണി നായകനായ  'സ്ട്രീറ്റ്' എന്ന ചിത്രമാണ്. ഇതിലും 'ചിയാൻ' വിക്രമും, ഷമ്മി തിലകനും ഒന്നിച്ചഭിനയിച്ചിരുന്നു.  ഇതനുസരിച്ച് ഏകദേശം മുപ്പത് വർഷങ്ങൾക്ക് ശേഷമാണ് വിക്രമിനൊപ്പം വീണ്ടും ഷമ്മി തിലകൻ ഈ ചിത്രത്തിൽ അഭിനയിക്കുന്നത്.