തെന്നിന്ത്യൻ സിനിമയിലെ പ്രശസ്ത നടിമാരിൽ ഒരാളായ കീർത്തി സുരേഷ് വിവാഹത്തിന് ശേഷം സിനിമകളിൽ അഭിനയിക്കുന്നത് കുറച്ചിരിക്കുകയാണ്. താരം അഭിനയിച്ച് അടുത്ത് റിലീസാകാനിരിക്കുന്നത് 'റിവോൾവർ റീറ്റ' എന്ന  തമിഴ് ചിത്രമാണ്. അതേ സമയം 'കന്നിവെടി' എന്ന ചിത്രത്തിലും  കീർത്തി സുരേഷ് അഭിനയിക്കുന്നുണ്ട്.

ഈ സാഹചര്യത്തിലാണ് തമിഴിലും, തെലുങ്കിലും  മുൻനിര സംഗീത സംവിധായകനായ ദേവി ശ്രീ പ്രസാദ് നായകനായി അരങ്ങേറ്റം കുറിക്കുന്ന 'എല്ലമ്മാ' എന്ന  തെലുങ്കു ചിത്രത്തിൽ നായകിയായി അഭിനയിക്കാനുള്ള അവസരം കീർത്തി സുരേഷിനെ തേടി  വന്നിരിക്കുന്നത്.  വേണു എഴ്ദണ്ടി സംവിധാനം ചെയ്യുന്ന ഈ ചിത്രം നിർമ്മിക്കുന്നത്  'ശ്രീ വെങ്കിടേശ്വര പ്രൊഡക്ഷൻസ്' ആണ്.

കഴിഞ്ഞ കുറച്ച് വർഷങ്ങളായി ഈ ചിത്രത്തിന്റെ പ്രീ-പ്രൊഡക്ഷൻ ജോലികൾ നടന്നു വരികയായിരുന്നു എന്നും,  ഈ ചിത്രത്തിൽ നായകനായി അഭിനയിക്കാൻ തെലുങ്കിലെ പ്രശസ്ത നടന്മാരായ നാനി, നിതിൻ, സർവാനന്ദ് എന്നിവരെ പരിഗണിച്ചിരുന്നു എന്നും എന്നാൽ  അവർ ഈ ചിത്രത്തിൽ അഭിനയിക്കാൻ  വിസമ്മതിച്ചതിനാലാണ് ഇപ്പോൾ ദേവി ശ്രീ പ്രസാദ് ഈ ചിത്രത്തിലെ  നായകനായിരിക്കുന്നത് എന്നാണ് പറയപ്പെടുന്നത്.

 ദേവി ശ്രീ പ്രസാദുമായി കീർത്തി സുരേഷ് നല്ല സൗഹൃത്തിലാണെന്ന കാരണത്തിനാൽ കീർത്തി സുരേഷ് ഈ ചിത്രത്തിൽ അഭിനയിക്കാൻ സമ്മതിക്കുമെന്നാണ് ഇപ്പോഴത്തെ റിപ്പോർട്ട്. അതിനാൽ ഇത് സംബന്ധമായുള്ള ഔദ്യോഗിക പ്രഖ്യാപനം അടുത്തുതന്നെ ഉണ്ടാകുമെന്ന് പ്രതീക്ഷിക്കാം.