കുറച്ച് വർഷങ്ങളായി സൂപ്പർഹിറ്റായ പഴയ സിനിമകൾ വീണ്ടും റിലീസ് ചെയ്യുന്നത് ഒരു പുതിയ ട്രെൻഡായി മാറിയിരിക്കുകയാണല്ലോ? അങ്ങിനെയുള്ള സിനിമകൾ ഇപ്പോഴുള്ള പുതിയ  സാങ്കേതികവിദ്യയുടെ സഹായത്തോടെയാണ് തിയേറ്ററുകളിലെത്തുന്നത്. മുൻപ് റിലീസായി വമ്പൻ വിജയമായ ചിത്രങ്ങളാണ് ഇങ്ങിനെ റീ-റിലീസ് ചെയ്യപ്പെടുന്നത്. എന്നാൽ ബോക്സ് ഓഫീസിൽ ദയനീയമായി പരാജയപ്പെട്ട ഒരു തമിഴ് ചിത്രം വീണ്ടും റിലീസ് ചെയ്യാൻ ഒരുങ്ങുന്നതായുള്ള റിപ്പോർട്ടാണ്  ഇപ്പോൾ പുറത്തുവന്നിരിക്കുന്നത്.

  ആ ചിത്രം പതിനൊന്ന് വർഷങ്ങൾക്ക് മുൻപ് സൂര്യ നായകനായി അഭിനയിച്ച്, എൻ. ലിങ്കുസാമി സംവിധാനം ചെയ്ത 'അഞ്ജാൻ' ആണ്.  എൻ.ലിങ്കുസ്വാമി രചനയും, സംവിധാനവും നിർവ്വഹിച്ച ഈ ചിത്രം 2014, ഓഗസ്റ്റ് മാസത്തിലാണ് റിലീസായത്. സൂര്യക്കൊപ്പം സാമന്ത, വിദ്യുത് ജംവാൾ, മനോജ് ബാജ്‌പേയി, ദലിപ് താഹിൽ, മുരളി ശർമ്മ, സൂരി, ചേതൻ, ഹൻസ്‌രാജ്, സഞ്ജന സിംഗ്, തുടങ്ങിയ താരങ്ങൾ അണിനിരന്ന ഈ ചിത്രം വൻ പ്രതീക്ഷകളോടെ റിലീസായെങ്കിലും ബോക്സ് ഓഫീസിൽ വലിയ പരാജയമായിരുന്നു. ഇപ്പോഴുള്ള ചില പുതിയ സാങ്കേതിക വിദ്യകൾ ഉപയോഗിച്ച് ചിത്രത്തിന്റെ കഥയിൽ തന്നെ ചില മാറ്റങ്ങൾ വരുത്തിയാണ് ഈ ചിത്രം റീലിസ് ചെയ്യുന്നത് എന്നും പറയപ്പെടുന്നുണ്ട്. അടുത്ത മാസം (നവംബർ) 28-ന് ചിത്രം തിയേറ്ററുകളിലെത്തുമെന്നാണ് റിപ്പോർട്ട്.