തെന്നിന്ത്യൻ സിനിമയിലെ മുൻനിര നടിയായ  കീർത്തി സുരേഷ് നായകിയായി അഭിനയിച്ച് ഈയിടെ റിലീസായ ഹിന്ദി ചിത്രമാണ് 'ബേബി ജാൻ'. തമിഴിൽ അറ്റ്‌ലി സംവിധാനത്തിൽ, വിജയ് നായകനായി അഭിനയിച്ച് പുറത്തുവന്ന്  സൂപ്പർഹിറ്റായ 'തെറി'യുടെ  റീമേക്കാണ് 'ബേബി ജാൻ'. അറ്റ്‌ലി നിർമ്മിച്ച ഈ ചിത്രം വൻ പരാജയമായിരുന്നു. 'രഘു താത്ത' എന്ന ചിത്രമാണ് കീർത്തിയുടേതായി തമിഴിൽ അവസാനമായി റിലീസായ ചിത്രം. ഈ രണ്ടു ചിത്രങ്ങളുടെ റിലീസിന് ശേഷമാണ് കീർത്തി സുരേഷ് വിവാഹിതയായത്. വിവാഹത്തിന് ശേഷം കീർത്തി സുരേഷ് പുതിയ സിനിമകളൊന്നും കമ്മിറ്റ് ചെയ്തിട്ടില്ല. 'അക്ക' എന്ന വെബ് സീരീസിലാണ് താരം ഇപ്പോൾ അഭിനയിച്ചുകൊണ്ടിരിക്കുന്നത്.  Netflix OTT പ്ലാറ്റ്‌ഫോമിലാണ് ഈ വെബ് സീരീസ് റിലീസാകുന്നത്. ചരിത്ര കഥയെ ആസ്പദമാക്കി ഒരുക്കുന്ന ഈ  വെബ് സീരീസിൻ്റെ ടീസർ അടുത്തിടെ പുറത്തിറങ്ങിയിരുന്നു. ഈ സാഹചര്യത്തിലാണ് കീർത്തി സുരേഷ് വീണ്ടും ഒരു ഹിന്ദി സിനിമയിൽ അഭിനയിക്കാൻ പോകുന്നു എന്നുള്ള വാർത്ത പുറത്തുവന്നിരിക്കുന്നത്.  റൊമാൻ്റിക് കോമഡി ചിത്രമായി ഒരുങ്ങാനിരിക്കുന്ന ഈ ചിത്രത്തിന്റെ അണിയറപ്രവർത്തകർ കുറിച്ചുള്ള വിവരങ്ങളൊന്നും പുറത്തുവന്നിട്ടില്ല. എന്നാൽ കീർത്തി സുരേഷ്  ഈ ചിത്രത്തിൽ അഭിനയിക്കാൻ കരാറിൽ ഒപ്പിട്ടു എന്നാണ് പറയപ്പെടുന്നത്.